ਲ ਨਾਲ ਸ਼ੁਰੂ ਹੋਣ ਵਾਲੇ ਮੁਹਾਵਰੇ
1. ਲਾਹ-ਪਾਹ ਕਰਨੀ : (ਝਾੜ ਝੰਬ ਕਰਨੀ) ਵਿਚਾਰੇ ਕਲਰਕ ਤੋਂ ਨਿੱਕੀ ਜਿਹੀ ਗ਼ਲਤੀ ਹੀ ਹੋਈ ਸੀ ਕਿ ਅਫ਼ਸਰ ਨੇ ਉਸਦੀ ਅਜਿਹੀ ਲਾਹ-ਪਾਹ ਕੀਤੀ ਕਿ ਉਹ ਸਿਰ ਫੜ ਕੇ ਬਹਿ ਗਿਆ।
2. ਲੂਣ-ਹਰਾਮ ਕਰਨਾ : (ਨੇਕੀ ਨਾ ਜਾਣਨਾ) ਅੱਜ ਕੱਲ੍ਹ ਜਿੰਨਾ ਮਰਜ਼ੀ ਕਿਸੇ ਦਾ ਭਲਾ ਕਰ ਲਵੋ ਪਰ ਕੁਝ ਲੋਕੀਂ ਬੜੇ ਲੂਣ-ਹਰਾਮ ਹੁੰਦੇ ਹਨ।
3. ਲੱਕ ਸਿੱਧਾ ਕਰਨਾ : (ਥੋੜ੍ਹਾ ਜਿਹਾ ਥਕੇਵਾਂ ਲਾਹੁਣ ਲਈ ਲੇਟਣਾ) ਮੇਰੇ ਮਾਤਾ ਜੀ ਘਰ ਦਾ ਸਾਰਾ ਕੰਮ ਮੁਕਾ ਕੇ ਲੱਕ ਸਿੱਧਾ ਕਰਨ ਲਈ ਲੇਟੇ ਹੀ ਸਨ ਕਿ ਪ੍ਰਾਹੁਣੇ ਆ ਗਏ।
4. ਲਹੂ ਦੇ ਅੱਥਰੂ ਰੋਣਾ : (ਬੜੇ ਦੁੱਖ ਨਾਲ ਰੋਣਾ) ਅਮਰੀਕ ਸਿੰਘ ਦੀ ਮੌਤ ਹੋਈ ਨੂੰ ਦੋ ਸਾਲ ਹੋ ਗਏ ਹਨ ਪਰ ਉਸਦੀ ਪਤਨੀ ਅੱਜ ਵੀ ਲਹੂ ਦੇ ਅੱਥਰੂ ਰੋਂਦੀ ਹੈ।
5. ਲਹੂ ਨਾਲ ਹੱਥ ਰੰਗਣਾ : (ਹੱਤਿਆ ਕਰਨਾ) ਕੱਲ੍ਹ ਸਾਡੇ ਬੈਂਕ ‘ਚ ਲੁਟੇਰਿਆਂ ਨੇ ਲੁੱਟ ਮਾਰ ਤਾਂ ਕੀਤੀ ਹੀ ਪਰ ਜਾਂਦੇ – ਜਾਂਦੇ ਵਿਚਾਰੇ ਗੰਨਮੈਨ ਦੇ ਲਹੂ ਨਾਲ ਵੀ ਹੱਥ ਰੰਗ ਗਏ।
6. ਲਗਾਮ ਢਿੱਲੀ ਛੱਡ ਦੇਣਾ : (ਖੁਲ੍ਹ ਦੇਣਾ) ਸ਼ੇਰੇ ਨੇ ਜਵਾਨ ਹੋ ਰਹੇ ਪੁੱਤਰ ਦੀ ਲਗਾਮ ਢਿੱਲੀ ਛੱਡੀ ਹੀ ਸੀ ਕਿ ਉਹ ਕੁਰਾਹੇ ਪੈ ਗਿਆ।
7. ਲਹੂ ਸੁੱਕਣਾ : (ਸਾਹ ਸੁੱਕਣਾ) ਸੱਪ ਨੂੰ ਆਪਣੇ ਵੱਲ ਆਉਂਦਿਆਂ ਵੇਖ ਕੇ ਹਰਨਾਮੇ ਦਾ ਲਹੂ ਸੁੱਕਣ ਲੱਗਾ।
8. ਲਹੂ-ਪਾਣੀ ਇੱਕ ਕਰਨਾ (ਮਿਹਨਤ ਕਰਨੀ) ਇਸ ਮਹਿੰਗਾਈ ਦੇ ਸਮੇਂ, ਦੋ ਡੰਗ ਦੀ ਰੋਟੀ ਪ੍ਰਾਪਤ ਕਰਨ ਲਈ, ਗ਼ਰੀਬਾਂ ਨੂੰ ਲਹੂ-ਪਾਣੀ ਇੱਕ ਕਰਨਾ ਪੈਂਦਾ ਹੈ।
9. ਲੱਕ ਬੰਨ੍ਹਣਾ : (ਤਿਆਰੀ ਕਰਨੀ) ਇਸ ਮੁਸ਼ਕਲ ਕੰਮ ਨੂੰ ਸਿਰੇ ਚਾੜ੍ਹਨ ਲਈ ਹੁਣ ਤੋਂ ਹੀ ਲੱਕ ਬੰਨ੍ਹਣ ਦੀ ਲੋੜ ਹੈ।
10. ਲੱਤ ਮਾਰਨੀ : (ਵਿਘਨ ਪਾਉਣਾ) ਹਰਮੋਹਨ ਦੇ ਰਿਸ਼ਤੇ ਵਿੱਚ ਉਸਦੇ ਤਾਏ ਨੇ ਅਜਿਹੀ ਲੱਤ ਮਾਰੀ ਕਿ ਵਿਚਾਰੇ ਦੀ ਮੰਗਣੀ ਹੁੰਦੀ – ਹੁੰਦੀ ਰਹਿ ਗਈ।
11. ਲਾਲ-ਪੀਲਾ ਹੋਣਾ : (ਗੁੱਸੇ ਵਿਚ ਆਉਣਾ) ਆਪਣੇ ਦੋਸਤ ਨੂੰ ਮਾਰ ਪੈਂਦੀ ਵੇਖ ਕੇ ਕਰਮਜੀਤ ਲਾਲ-ਪੀਲਾ ਹੋ ਗਿਆ, ਪਰ ਦੁਸ਼ਮਣਾਂ ਦੀ ਗਿਣਤੀ ਜ਼ਿਆਦਾ ਵੇਖ ਕੇ ਉਹ ਚੁੱਪ ਹੀ ਰਿਹਾ।
12. ਲਹਿਰ ਬਹਿਰ ਹੋਣਾ : ਸੁਖੀ ਹੋਣਾ।
13. ਲਹੂ ਚਿੱਟਾ ਹੋਣਾ : ਪਿਆਰ ਤੇ ਹਮਦਰਦੀ ਨਾ ਰਹਿਣੀ।
14. ਲਹੂ ਦਾ ਘੁੱਟ ਪੀਣਾ : ਕਰੋਧ ਕਰਨਾ, ਗੁੱਸਾ ਪੀ ਜਾਣਾ।
15. ਲਹੂ ਦਾ ਤਿਹਾਇਆ ਹੋਣਾ : ਪੱਕਾ ਵੈਰੀ ਹੋਣਾ।
16. ਲਹੂ ਪੀਣਾ : ਬਹੁਤ ਤੰਗ ਕਰਨਾ।
17. ਲੱਕ ਸੇਕਣਾ : ਕੁੱਟਣਾ।
18. ਲੱਕ ਟੁੱਟਣਾ : ਹੌਸਲਾ ਟੁੱਟਣਾ, ਘਾਟਾ ਪੈਣਾ।
19. ਲਕੀਰ ਦਾ ਫ਼ਕੀਰ ਹੋਣਾ : ਪੁਰਾਣੀਆਂ ਰਸਮਾਂ-ਰੀਤਾਂ ’ਤੇ ਚੱਲਣਾ।
20. ਲੱਟੂ ਹੋਣਾ : ਮੋਹਿਤ ਹੋਣਾ।
21. ਲੱਤ ਅੜਾਉਣੀ : ਖਾਹ-ਮਖਾਹ ਦਖ਼ਲ ਦੇਣਾ।
22. ਲੱਤ ਹੇਠੋਂ ਕੱਢਣਾ : ਹਾਰ ਮਨਾ ਦੇਣਾ, ਅਧੀਨ ਕਰਨਾ।
23. ਲਾਰੇ ਲਾਉਣੇ : ਝੂਠੇ ਵਾਅਦੇ ਕਰਨੇ।
24. ਲੀਕ ਪੈਣੀ : ਰਿਵਾਜ ਪੈ ਜਾਣਾ।
25. ਲੀਕ ਲੱਗਣੀ : ਬਦਨਾਮੀ ਹੋਣੀ।
26. ਲੂਤੀ ਲਾਉਣਾ : ਚੁਗਲੀ ਕਰਨੀ।
27. ਲੇਖ ਸੜਨੇ : ਭੈੜੀ ਕਿਸਮਤ ਹੋਣਾ ।
28. ਲੇਖ ਜਾਗਣੇ : ਭਾਗ ਜਾਗਣੇ / ਕਿਸਮਤ ਬਦਲ ਜਾਣੀ।
29. ਲੋਈ ਲਾਹੁਣੀ : ਸ਼ਰਮ-ਹਯਾ ਲਾਹ ਦੇਣੀ।
30. ਲੋਹਾ ਲਾਖਾ ਹੋਣਾ : ਬਹੁਤ ਗੁੱਸੇ ਹੋਣਾ।